kabarSunda.com- Runtah masih jadi pasualan di Jawa Barat khususna, umumna di Indonesia. Pasualan runtah salian can aya teknologi nu cocok oge kabiasaan nu can robah.
Runtah jalma moderen geus beda pisan jeung runtah jalma baheula. Runtah jalma baheula atawa jalma nu acan moderen, jinisna ngan ukur organik, jalaran sagala rupa ukur ngagunakeun rupa-rupa bahan tina tatangkalan. Jalma moderen salian runtah organik oge ngahasilkeun runtah keretas, palastik, logam, kaen jeung bahan nu bahaya.
Robahna jinis runtah can ngarobah kabiasaan jalma moderen. Runtah nu rupa-rupa jinisnya angger dipiceun sagebrus ka tempat runtah atawa ka walungan, nu penting teu katingali deui. Lantaran jinis runtah geus robah oge jumlahna beuki loba, salian nyababkeun bau, nyebarkeun panyakit, oge nyababkeun banjir jeung ngaruksak walungan, laut, jeung alam sakuringna. Ngokolakeun runtah kudu jadi kabiasaan nu dimimitian ti masing-masing warga.
Runtahbisa jadi bahaya, bisa jadi nambahan harta. Bahaya lamun urang miceun runtah sangeunahna, teu dikokolakeun nu bener. Nambahan harta lamun runtah dikokolakeun, mimiti dipisah, diolah, digunakeun deui, atawa dijual. Runtah organik bisa dijieun kompos, bisa jadi dahareun magot, nu saterusna magot bisa jadi pakan hayam atawa lauk. Urang bakal boga bahan pangan protein keur nyukupan pangan kulawarga.
Runtah anorganik bisa dijual ka bank sampah nu bakal diolah deui jadi rupa-rupa barang. Urang bakal meunang cuan lamun setor ka bank sampah. Hayu biasakeun ngokolakeun runtah ku mimiti ngurangan runtah, misahkeun runtah, datang ka bank sampah supaya urang hirup leuwih raharja. Lingkungan beresih, awak sehat, harta nambah. Ngokolakeun runtah salian ngadukung keur karaharjaan alam lingkungan oge gede manfaatna keur pribadi jeung kulawarga.
