KabarSunda.com- Runtah geus jadi pasualan ti saprak TPA Leuwi Gajah longsor 21 Pebruari 2005. Longsor nu nyababkeun 150 urang tiwas katutup ku longsoran. Gunung runtah nu panjangna 200 méter sarta luhurna 60 méter, oyag alatan hujan badag. Akumulasi gas métana tina tumpukan runtah ngabeledug nyababkeun tumpukan runtah urug ngarurug awak para tukang mulung.
Geus 20 taun ka tukang, tapi urang angger teu malire kana pasualan runtah. Urang ngan mindahkeun gundukan runtah ka tempat nu lian. Nu hartina ngan mindahkeun pasualan nu sarua jeung 20 taun ka tukang. Sabudeureun Bandung ayeuna miceun runtah ka TPA Sarimukti, nu geus teu kuateun nampung runtah. Salila jelema hirup tangtu bakal ngahasilkeun runtah. Beuki lila runtah beuki loba. Kumaha atuh carana supaya runtah ngurangan?
Jejeg sataun pasualan TPA Sarimukti nu geus teu bisa nampung runtah atawa geus ngaleuwihan kamampuhna nampung runtah. Salila sataun geus rupa-rupa cara supaya runtah ngurangan ti sumberna (imah, pasar, rumah sakit, restoran, jeung sajabana). Tapi gening masih angger runtah loba keneh malah sok balatak teu diangkut atawa minuhan Walungan Citarum.
Runtah ti imah rupa-rupa jinisnya, aya sesa kadaharan, dangdaunan, plastik, kertas, logam jeung sajabana. Biasana minceuna dihijikeun nu diakut ka TPS terus ka TPA. Runtah nu dihijikeun salian nambahan loba nu dibawa ka TPA oge nyababkeun gas metana nu bakal ngabahayakeun. Kawijakan ayeuna runtah sesa kadaharan atawa daun (organik) teu meunang dipiceun ka TPA Sarimukti. Di Kota Bandung, lamun teu dipisahkeun moal diangkut.
Urang mimitian di imah misahkeun runtah. Runtah dibagi kana sababaraha jenis.
Organik (sesa kadaharan, sesa bungbuahan, sayuran) jeung anorganik (plastik, keretas, kaen, logam jeung sajabana). Runtah anorganik bisa dipisah-pisah deui utamana lamun aya bahan nu ngabahayakeun. Runtah organik bisa dikokola jadi kompos keur tatangkalan sabudeureun imah. Jadi runtah teu kaluar ti lingkungan imah lantaran digunakeun keur bahan kompos/pupuk. Runtah anorganik bisa disetorkeun ka bank sampah (tingali di aplikasi Sapawarga-SampahKita) peta lokasi bank sampah jeung nomor WA nu bisa dikontak. Ka bank sampah setor runtah bakal meunang rupiah.
Ngokolakeun runtah bisa rupa-rupa jeung nguntungkeun urang, bisa keur pupuk haratis, bisa meunang rupiah lamun urang setor ka bank sampah. Lingkungan beresih jeung awak sehat oge tabungan jadi nambah. Hayu pisahkeun runtah ti imah.(Ika Mardiah, Kepala Dinas Kominfo Jabar)
